昔日東方政情：學無前後 畢堅文向晚輩請教元宇宙
一般人嘅印象中，學員嘅年紀會細過導師。響應終身學習嘅生產力促進局總裁畢堅文，最近就跟隨兩位導師，學習元宇宙以及機械人技術。之不過，向佢傳授知識者並非上咗年紀嘅師傅，而係年輕後輩！佢話後生仔對於科技嘅認識，較自己呢一輩係高好多，掌握亦都快好多，的確係學無前後、達者為先啊！
畢堅文日前喺一個網絡訪談中，提及生產力促進局有一個逆向導師計劃。儘管論年紀或工作資歷，佢係好多人嘅「前輩」，但一講到科技知識，就要向後生仔學習啦。
藉學科技理解後輩世界觀
畢堅文話通過呢兩位年輕導師，每兩星期一次嘅會面，令佢懂得好多新知識，同時亦令佢了解後生仔嘅想法同世界觀。佢又話當今社會，知識不斷推陳出新，當學生離開學校嘅一刻，課堂上嘅知識有可能經已過時、或將被淘汰，所以佢鼓勵在職朋友終生學習。
對於本地家長，都期望子女就讀律師、醫生、會計師等「神科」嘅現象，畢堅文指依家全世界都話搞創科，相關企業求才若渴，譬如喺香港要聘請數據科學家係非常困難，因此年輕人投身創科大有前途。雖然成功嘅創科企業並唔多，但佢建議年輕人先到企業任職，累積一定經驗，先再出去闖一闖。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
